Isteytside Dramas

'Salamat din naman at binigyan mo ako ng gawa ni pareng Calvin.'

Dumating si pinsan at may dalang supot. Maraming salamat sa pasalubong. Halos mapa-iyak ako na parang pang Famas awards ng makita ko ang laman ng supot. Hindi pala mga porn mags na nasa isip ko ang laman nito. Pero siyempre natuwa naman ako dahil nag-abala ka at inambunan mo ako ng grasya, grasya na katas ng Saudi Arabia. Sana sa susunod matumbok mo na ang gusto kong pasalubong. Gawin mo na lang "clue" yung pag-aakala ko kanina. Deh, biro lang.

Nagtataka lang ako kung bakit binigyan mo ako ng malaking puting sabon na me tatak na ibon. Wag ka namang ganyan, paraan mo ba ito para sabihing magsabon ako kapag maliligo? Tagna naman. Para sa kaalaman mo nagsasabon po ako. Mas mabula pa nga sa sabon na binigay mo ang gamit ko e. Sa sobrang bula, kung minsan isinasabay ko na sa paliligo ang paglalaba ng aking brip at medyas.

Pero wag ka mag-alala, ginamit ko na din ang sabong bigay mo na me 1/4 moisturizer daw. Haha! Nakakatuwa naman, hindi lang balat ko ang moisturized, pati ang underwear ko parang naka fabric conditioner na rin.

Maraming salamat na rin sa malaki at mabangong lotion na bigay mo. Na nakasulat sa Arabong mga titik, ewan hindi ko alam pero parang ang mga sulat ay propesiya na malapit na magunaw ang mundo. Sadyang hindi ko maintindihan. Ibig ba sabihin nun kapag nahaplusan ang mga braso at hita ko ng lotion ay maaaring magunaw na ang Planet Earth? Anong kainsultuhan naman yun. Tangna ulet. Hindi ko naman talaga kailangang magpahid ng lotion sa katawan ko e. Malamang alam mo na, na pawisin talaga akong tao. Kahit hindi ako gumalaw, pinagpapawisan ako. Sa noo, sa kamay, sa kili-kili, at higit sa lahat sa singit.

At dahil laging basa ang aking palad, umiiwas akong makipag kamay kapag ipinapakilala. Ibang paraan na lang ginagawa ko. Sinasaluduhan ko na lang siya, kahit hindi siya sundalo. Ayoko kasing maramdaman niya na malagkit na ang kamay ko sa pawis at baka isipin na katatapos ko lang. Diyahe naman. At lalong hindi rin ako nakikipag-holding hands. Baka maturn-off pa sa naglalangis kong mga palad. Diretso lips to lips na kaagad kung makakalusot. Panigurado namang hindi naglalangis ang aking mga labi depende na lang kung kakakaen ko lang ng porkchop na sinabawan ng mantika ni ermats. At kailanman, hindi ko naging paborito ang kantang "Hawak Kamay" ni Yeng Guiao este Yeng Constantino. Iniisip ko pa lang napapa eeewwww na ako. Pakiusap.

Malamang gagamitin ko na lang na lubricant ang lotion na bigay mo. Lubricant sa tool ko. I mean sa tools ko na medyo madaling kalawangin gaya ng pliers, screw driver, etc.

Salamat din naman at binigyan mo din ako ng gawa ni Pareng Calvin K.

For the first time in my probinsiyano life ngayon lang talaga malalapatan ng medyo sosyal na pabango ang aking balat na ipinaglihi sa kahoy na panggatong. Dati amoy rubbing alcohol lang ako kapag lumalabas ng bahay. Ngayon aba'y amoy CK na. Naks na malupet. Kung inaakala mong itatago ko ito at titipirin, nagkakamali ka. Simula nang maglingunan ang pasahero ng bus dahil amoy isteytsayd ako, inaraw-araw ko na ang pag gamit. Me narinig nga akong nagsabi, amoy-pogi daw ang dumaan. Shet!

Kaso, amoy lang.

Sana insan, sa susunod mong bakasyon at pagpunta sa bahay, siguruhin mong nasa bahay din ako. Ayan tuloy, di tayo nagkita. Magpapalibre pa naman sana ako. Joke lang. Ingat na lang sa biyahe pabalik at wag kang sasakay ng eroplano ng mga taga Malaysia at mahirap na baka sabihin na lang ng mga opisyal dun kapag nawala ang eroplano niyo sa himpapawid "malay ko." Nakakatakot.

Sa muli maraming salamat at nawa'y pagpalain ka ng Maykapal. Naks uli.

P.S. Ilang buwan pa bertdey ko naman insan. Hint, hint.....

(: