Nostalgic Machines: Betamax/VHS

'Ganitong-ganito ang betamax na uwi ni erpats galing Saudi.'

"Ayan na simula na, huwag na kayong maingay! ayan na....o kalaban 'yan... ay hindi... kakampi pala... proooot!"

Puta may umutot ambaho naman.

Masarap manood sa VHS o Betamax, laging enjoy kahit hindi maganda ang napiling bala, basta you're comfortable at your home. Noong panahon natin wala pa ang mga VCD at DVD. Sino ba ang nagpauso ng mga yan? Dahil sa inyo eh nagsarado ang mga rentahan ng beta at VHS sa may amin! Habang sinusulat ko ito ay tinititigan ko ang Betamax unit namin na nag-iipon na ng alikabok sa loob ng compact stereo na naiwan ni erpats. Haaay bumabalik na naman ang masasayang memories. 

Nauso ng husto ang pagrerenta ng bala ng betamax. Magpapamember ka tapos ayan na. Tuluy-tuloy na ang pagrenta kada weekend. Lagi akong hindi naisosoli on time dahil likas lang akong tinatamad. Pero ni minsan ata ay hindi ako nagbayad ng overdue payment dahil yung manager eh kaibigan ko yung anak niya na batang kalye din. Ano di ba noon pa man uso na ang palakasan system. 

'Betamax tapes'

Sa rentahan ay may drama section, action section, comedy section, romance section, horror/suspense/thriller section at siyempre sa may likod ng parte ng bidyo city ay may Scorpio Nights section o bomba section kung saan naghihintay ang mga suki kong sina Amanda Paige, Aya Medel, Katrina Paula, Priscilla Almeda, Rita Avila, Alma Concepcion at iba pa.

Pag-uwi sa bahay ay nagmamadali na akong umakyat ng kuwarto. Pagpasok sa kwarto ay BAM! Kandado agad ang kuwarto. Ay sandale. Bukas ulit ng kwarto. Punta muna sa banyo, kuha ng lotion para makinis ang balat at hindi nagda-dry, O-ha! Dadalhin ko ang lotion sa kwarto ulit para dun magpakinis ng balat. Ayan. Lock na ulit. And then, isasalang na ang bala. Ayan, nakatitig na ako sa TV. Siyempre kapag maganda na ang eksena ay....

Tok! tok! tok!

Puta pindot agad ng pause.

"Sandale" Ayan na bubuksan na nga ee!"

Sira ang session.

Buti na lang may rewinder kami.

'Ang dakilang Rewinder'

Ang betamax ang pinaka sikat na kasankapang-bahay natin noon na nagpalibang at nagpasaya sa atin sa bawat pamilya sa kanya-kanyang bahay. Ang betamax tapes ang rektanggulong bala na may mahabang film sa loob. May sticker na papel sa isang gilid para dun ilagay ang title ng pelikula. Kung sa maaayos na rentahan ka umarkila eh naka-typewriter ang sulat ng title nito pero kung sa pipitsuging rentahan ka eh sinulat lang ng may-ari gamit ng pentel pen ang title. 

Nanghihiram kami palagi ng mga pinsan ko sa aming kalye sa Tuazon sa San Andres Bukid, Maynila ng mga betamax tapes. Masaya nga kami dahil kapitbahay lang namin ang nagpaparenta. Bahay lang siya na nilagyan ng bookshelves ang isang kwarto para lagayan ng mga betamax at  tadaaahhh!! Isang video rentals na siya. Ang nagbabantay eh si Unique, ang kapitbahay kong kalaro ko sa tatching. Kapag maglalaro si Unique sa labas eh ang kuya niya ang tumatao. Suki na kami dito sa video rentals nila. Lahat ng WWF events eh sa kanila namin hinihiram katulad ng Royal Rumble, Summerslam at ang grand daddy ng wrestling pay-per-view events ang Wrestlemania. Masaya ako dahil ang ganda at ang linaw ng kopya kapag wrestling. 

Sandwich - Betamax

Siyempre dumating din ang VHS, ang upgraded version ng betamax. Ang DVD ng VCD. Mas marami kang malalagay na pelikula. Tatlo ata kasya dito eh. Pero ang pinakamagandang lamang ng VHS sa betamax eh ang rewinder1 Ewan ko lang ha pero ang alam ko eh walang rewinder ang betamax. Sa mismong betamax player mo siya i-rerewind at ang bagal ng prosesong yun.

Video Home Service ang ibig sabihin ng VHS. Hindi ko alam kung bakit kailangang mag-evolve ng betamax into a VHS. Pinalaking cassette tape ang betamax. Pinalaking betamax ang VHS. Bakit bamas malaki? Para mas maraming mailagay?

Isang araw sa pag-uwi ni erpats galing Saudi eh may dala siyang betamax player. Tapos may binili rin siyang mga bala syempre. Voltron! Looney Tunes! All the Marbles! Ilang ulit din naming pinanood 'to pero hindi nakakasawa. Parang may sinehan sa bahay! Nakakamiss talaga lalo na kapag weekend at manonood kami. Usually, cartoons ang pinapanood namin.

'VHS tapes'

Paglipas nga ng panahon e napalitan ng VHS ang betamax at sa VHS nagsimula gumamit ng rewinder. Lumaon pa ang panahon nagsara ang video rentals nila Unique at dito na kami nagsimulang mag-arkila sa Video City. Halos lahat noon ay may branch ng Video city eh at sikat na sikat noon ang ganitong business pero unti-unti itong nanamlay simula ng palitan ng VCD at DVD. 

Ang RA Homevision ang isa sa sikat na rentahan noon na nauna pa sa Video City

Iba pa rin talaga kapag betamax at makalumang player. Yung maiinis ka dahil yung hinahanap mong bala ay nasa hiraman, pagbalik mo uli ay nahiram ng iba at dito rin nauso ang "reserved". "Uyy kapag bumalik na paki-reserve mo na sa akin."| Yung sasabikin ka bago mo panoorin dahil kailangan munang irewind ang film bago mo mapanood ang umpisa. Yung mayayamot ka dahil hindi mo alam kung sa bala yung dahil o yung player mo kasi mukhang marumi at tumatalon ang picture ng TV screen mo. Yung matutuwa ka dahil HD ang pagkakuha ng rekord dahil napakalinaw. 

Ito ang panahon ng Betamax at VHS.

(Kinain ng VHS player ang bala):

"Tok! tok! tok!"

"Naku, sandali poooooo!"