Tandang-tanda ko pa yung iyak ni Bokyo nung nakuha ko lahat ng paborito niyang teks cards nung panahon na naglalaro kami nito sa kalye noong dekada nobenta. Basta pagsapit ng alas-kwatro ng hapon at pagkatapos kong magmeryenda ng pande-regla at Fanta strawberry ay diretso na kami sa aming arena, ang aming kalye para maglaro ng teks. Ang iba may mga dala-dala pang kahon at doon lahat nakasilid ang kanilang naiipon at nabibiling teks cards. Yung walang silid ng teks cards ang ginagawa nila ay binabalot nila sa kanilang damit kaya kita tuloy ang kanilang malalalking tiyan at nagdudumihang pusod, may extra teks cards din sila sa kanilang mga bulsa sa shorts. Sabay-sabay kaming maglalabasan sa bahay na akala mo mga action stars at ang aming weapon ay ang aming mga teks!
Bago pa dumating ang mga cellphone, tablets, at mobile games, simple pero masaya ang buhay-bata noong 90s. Isa sa mga paboritong libangan noon ay ang larong Teks. Pero ano nga ba ang Teks at paano ito nilalaro? Pag-usapan natin.
Ang Teks ay maliliit na karton—karaniwang sukat ay 1.5 x 2.5 inches—na may mga larawan ng cartoons, anime, action stars, o pelikula. May iba pang may “kwento” o dialogue sa likod, parang komiks.
Sinasabing galing ang pangalang “Teks” sa salitang “text” dahil nga may mga linya sa likod. Pero posibleng gawa-gawang term lang din ito na sumikat sa mga bata.
Simple lang laruin ang teks, pero may diskarteng kailangan.
-
Magdala ng koleksyon ng teks cards (minsan daan-daan ang bitbit).
-
Pumili ng 3 cards na ipupusta o ipapalo.
-
Magtaya ng ilang cards (e.g. “Lima ang taya!”).
-
Ipitin sa pagitan ng daliri, itoss o ihagis sa ere, at hintayin kung alin ang face-up o face-down.
-
Kung 2 o 3 ang face-up, panalo ka.
-
Kung 2 o 3 ang face-down, talo ka.
-
May iba’t ibang bersyon sa bawat barangay. Minsan may pa-jackpot o dagdag na rule.
Dagdag ko lang na ang mga teks ay mga kwentong hinati-hati sa maliliit na cards. Halos yung sinasabi lang ng karakter ang makikita mo sa teks dahil sa liit nito. Lahat ng batang kalye nagkaron niyan, konti man o marami basta nagkaron. May batang ilang kahon ng sapatos ang napupuno ng teks. Syempre siya ang magaling maglaro kaya nakakolekta siya ng ganyan karami. Siya ang batang magaling pumitik ng teks na may pektus. Matindi ang mga pamato niyang gamit. Hindi ko alam kung bakit ganun kagaling ang pamato niya at palagi itong nananalo. Feeling ko dati e may talento talaga ang pamato niyang gamit at sumusunod talaga sa amo. Hingin mo na lahat ng teks niya huwag lang ang pamato niya. Kahit gaano kaluma at sobrang daming tupi nito e hindi mo ito pwedeng hingin. Sila rin ang malalakas pumusta sa laro. Minsan isang pitik lang e isang dangkal na teks na ang pusta. Minsan nga kapag nagkakayabangan na talaga e lagpas isang dangkal ang taya at ubusan talaga ng teks.
Meron rin namang bata na isang dangkal lang ang teks na meron siya. Sila ang mga bano. Hindi talaga sila nakikipagpustahan sa iba at puro hingi lang ang teks nila. Parang mga balato lang ang teks nila na galing sa magaling maglaro. Kung maglaro man sila, sila-sila rin ang naglalaban at napakakonti pa ng mga taya nilang teks para hindi agad maubos ang kakapiranggot nilang koleksyon. Sila rin ang mga hindi marurunong pumitik ng teks. Parang ibabato lang nila sa ere ng paikot at ok na. Kaya rin sila hindi nanalo kasi walang pektus ang bato e. Walang nangyayari sa pamato nila. Minsan nga e dahil hindi naman talaga sila nakikipaglaban e inaayos na lang nila ang mga teks nila sa pagkakasunud-sunod ng kwento. Hinahanap nila ang magkakasunod na scene at nalilibang na sila dun. Sila din yung minsan na naroon lang, nanonood pero hindi sasali sa laro dahil ayaw na nilang mabawasan ang teks nila.
🛍️ Saan Nakakabili ng Teks?
Sa murang halaga, makakabili ka na ng teks sa:
- Sari-sari store
- Palengke
- Tiangge o mga kariton vendors
- May mga batang gumagawa pa ng sarili nilang teks gamit ang lumang karton at print-outs.
Kapag sa mismong laro naman may kanya-kanyang style rin yan. Una syempre sa pamatong gamit. Kung anong teks ang feeling nila na palaging panalo o swerte, yan ang magiging pamato. Pangalawa ay ang pagkakasunod ng tatlong teks na gagamitin sa laro. Minsan sa ibabaw ilalagay ang pamato bago pitikin, minsan sa ilalim naman. Iiba’t-ibahin sa laro yang ayos hangga’t madali ang swerteng kombinasyon. At syempre ang pektus, minsan pataas at minsan naman e pagilid na mabilis ang ikot. Minsan e tumutunog pa talaga ang mga teks sa sobrang lakas ng pitik.
Ang saya ng teks ay nasa simpleng pagkatalo at tagumpay. Isang hapon lang, puwede kang mawalan ng 50 cards—o makadagdag pa ng isang daan.
Ngayon, hindi na masyadong kilala ng kabataan ang teks, pero para sa batang 90s, ito ang tunay na level-up.
Walang komento:
Mag-post ng isang Komento