Stylin' and Bitchin' In The 90s

 

Sigurado ako na maraming batang 90s ang makakarelate sa pag uusapan natin ngayon. Isa din ako sa gumamit nito noong dekada nobenta. Gamit sa school, pagbisita sa simbahan tuwing Linggo, mga mahahalagang okasyon sa buhay ng tao at higit sa lahat kung gusto mong magpapogi lalo na kung bagong tasa ang iyong buhok. Sino ba naman ang hindi makakalimot sa isang plastic bottle at sachet ng himala na nagsilbing trophy ng  pagbibinata noong dekada ‘90, walang iba iyon kundi ang Young Styling Gel—ang iba't-ibang kulay na gel na tila amoy-first crush, pawis sa PE, at pangarap maging pogi sa school fair, lahat naka-condense sa isang plastik na lalagyan.

Noong ‘90s, hindi lang basta gel ang Young Styling—isa siyang gamit pang araw-araw lalo na ng mga kalalakihan. Bago pumasok sa eskwela, iisang kutsarang gel ang inilalagay sa palad, kakalat sa buhok na parang nagsha-shampoo, sabay bulong: “Lord, sana tumayo hanggang uwian.” Kahit tanghali na at lumalaban ang humidity ng Maynila, ang buhok ay todo tikas—parang sundalong naka-ready sa flag ceremony.

Dahil ito ang opisyal na pabango ng kabataan. Amoy lalaki. Amoy crush ng bayan. Amoy superstar ng varsity team, at higit sa lahat—ito ang unang sandata ng confidence bukod pa sa pagiging Eskinol boy at Gilette ahit pogi. Sa isang pitik ng suklay, pakiramdam mo puwede ka nang sumali sa That's Entertainment o maging extra sa T.G.I.S. o GIMIK. 

Anong hairstyle ang pinagkakaguluhan noon?

Ay, walang tatalo sa “patayong bangs” o mas kilala bilang "pinadilaan sa kalabaw". ‘Yung tipong may physics project sa noo mo dahil sa taas ng bangs na suportado ng 3mm kapal ng Young Styling. Kapag humangin? Hindi gagalaw kahit signal no 3. Kapag uminit? Matutunaw ang mundo pero hindi ang bangs mo. Kapag umabot sa uwian? Solid pa rin sa kapit—parang feelings mo sa crush mong hindi ka pinapansin.

Meron ding “wet look”, ‘yung parang bagong ligo kahit pangatlong ulit mo na suotin ang PE uniform. Sariwa pa rin ang datingan—salamat sa Young Styling Gel. 

Nada Surf - Popular

Pero sa panahon ngayon… ano na ang pumalit sa Young Styling?

Ngayon, ang mga Gen Z ay hindi na humahawak ng gel kundi ng:

• Hair clay (para sa mukhang “effortless” kahit 20 minutes mo yang inayos)
• Pomade (yung amoy imported pero presyo pang-maynila)
• Hair wax (para sa “messy look” na hindi messy)
• At siyempre… Korean-inspired perms na kalahati ng sahod ang ginastos pero sulit dahil “K-drama ang aura.”

Hindi na uso ang patayong bangs—napalitan na ng soft boy hair, curtains, at air-dried messy curls. Kung noong ‘90s, ang goal ay “matigas ang buhok,” ngayon ang goal ay “natural ang dating pero dapat mahal ang produkto.”

Sa huli ang Young Styling Gel ay hindi lang produkto—isa itong souvenir ng ating kabataan, ng mga panahong simple lang ang kaligayahan:

Isang suklay sa bulsa, isang patayong bangs, at isang puso na kasing lambot ng gel pagkaharap kay crush.

Kung mabango ang alaala ng ‘90s, dahil iyon sa Young Styling. Nariyan pa rin naman sila sa tindahan, buhay pa rin ang amoy at alaalang iniwan nito—sticky, shiny, at walang kupas.

Hindi rin pahuhuli ang Michael Gel noong 90s na kasabayan ng Youngs Styling Gel,  ang pomada ni lolo, ang Suave na kulay blue at red na kadalasang ginagamit ko noong high school kaso napakasobrang init nito sa buhok pero bibigyan ka naman ng super wet look plus sobrang bango din nito. Kung hair wax naman ay nariyan ang Gatsby na subok talaga sa pagkapit ng buhok kung gusto mo talaga mag style ng mala-Mohawk na hairstyle ay pwedeng-pwede